काठमाडौं– नेपालको अग्रणी विमानसेवा प्रदायक कम्पनी बुद्ध एयरले भारतको ऐतिहसिक तथा धार्मिक नगरी वाराणसीमा आउँदो असार १५ गतदेखि साताको दुई उडान गर्ने भएको छ । हिमालय होटलमा आज आयोजित प्रेस कन्फ्रेन्समा बुद्ध एयरका प्रबन्ध निर्देशक वीरेन्द्रबहादुर बस्नेतले दुई पौराणिक नगरी काठमाडौं र वाराणसीलाई नेपालको बुद्ध एयरले मात्रै हवाई उडानबाट जोडेको बताए । बुद्धले वाराणसीमा यसअघि मासिक दुई उडान भर्ने गरेको थियो ।

बुद्ध एयरले उडानसँगै नेपाली तथा भारतीय यात्रु/तिर्थालुहरुलाई भारी छुटमा पर्यटकीय तथा धार्मिक यात्रा प्याकेज पनि उपलब्ध गराउने जनाएको छ । प्रेस कन्फरेन्समा निर्देशक बस्नेतले नेपालगन्ज तथा भारतको नयाँदिल्ली उडानबारे पनि जानकारी गराएका थिए । यसका लागि कम्पनीले यही साताभित्रै मन्त्रालय तथा विभागहरुमा निवेदन बुझाउने जनाएको छ ।

बुद्ध एयरका रिसर्च तथा डेभलपमेन्ट विभागकी एक्जुकेटिभ अफिसर आस्था बस्नेतले कम्पनीको होलिडे प्याकेजबाट बुद्ध एयरलाई मात्र नभई सबै सरोकारवालालाई उत्तिकै फाइदा हुने बताइन् । प्याकेजबाट होटल, ट्रान्सर्पोटेसन, टुर गाइडलगायत अन्य सबैलाई फाइदा हुने उनले जानकारी गराइन् ।

भारतीय तथा विदेशी पर्यटकका लागि टेम्पल रन, टेल अफ टु भ्यालिज, टेम्पलस एन्ड टाइगर्स तथा मनकामना, जानकी, मुक्तिनाथ दर्शन तथा अन्य प्याकेज पनि छन् । यसैगरी, नेपाली यात्रुका लागि वाराणसी, सारनाथ, गया, बोधगया, इहालावाद, प्रयाग, अयोध्यालक्षित प्याकेज पनि रहेको उनले बताइन् ।

प्रकाशित समय १६:२२ बजे