भ्रमण वर्ष २०२० लाई सफल बनाउन सुनसरीको कोशी गाउँपालिकाले कोशी पर्यटन महोत्सवको आयोजना गर्ने भएको छ ।

आगामी माघ १९ गतेदेखि २९ गतेसम्म कोशी गाउँपालिका लाग्ने महत्वबारे विराटनगरमा पत्रकार सम्मेलन गरि जानकारी दिइएको हो ।

पर्यटकलाई आकर्षण गर्ने विभिन्न प्याकेजसहित गाउँपालिकाले पर्यटन महोत्सवको आयोजना गर्ने भएको हो । त्यहाँ आउने पर्यटकले हात्तीदेखि जंगल सफारीसम्मको यात्रा गर्न पाउने पत्रकार सम्मेलनमा जनाइएको छ ।

गाउँपालिका अध्यक्ष ऐयुब अन्सारीले ५० हजार भारतीय, तेस्रो मुलुक र आन्तरिक पर्यटकसहित महोत्सवमा १ लाखले अवलोकन गर्ने लक्ष्य राखिएको जानकारी दिए । विश्व चरा महोत्सवको अवसर पारेर गर्न लागिएको पर्यटन महोत्सवलाई प्रदेश १ का मुख्यमन्त्री शेरधन राईले उद्घाटन गर्ने कार्यक्रम रहेको छ । माघ १९ गतेदेखि १० दिनसम्म चल्ने सो महोत्सवमा घुम्न आउने पर्यटकका लागि जंगल ड्राइभ, जल र हात्ती सफारीको आकर्षक सुविधा समेत उपलब्ध गराइने अध्यक्ष अन्सारीले बताए ।

‘महोत्सवले भ्रमण वर्ष २०२० लाई सफल पार्न महत्वपूर्ण भूमिका खेल्ने विश्वास लिएका छौँ ।’ अध्यक्ष अन्सारीले भने, ‘गाउँपालिका भारतीय सीमासँग जोडिएकाले भारतीय पर्यटकको बढी मात्रामा उपस्थिति रहने छ ।’

उनले कोशी कटानदेखि १७ किलोमिटरको यात्रा गराएपश्चात् जल सफारी गराउने हिसाबले काम अघि बढाइएको जानकारीे दिए । महोत्सवमा मैथली झिझिया र जटाजटिन, लोक भाकादेखि झाँगड, थारु, चण्डी, धान नाच, लाखे प्रदर्शनी, तामाङ सेलो, गुरुङ र मगर सोरठीको प्रस्तुतिसमेत राखिने बताइको छ ।

अध्यक्ष अन्सारीका अनुसार नेपाली सांस्कृतिक अन्तघुलन गराउनका लागि बहुजातीय सांस्कृतिक कार्यक्रम राखिएको हो । महोत्सवमा खेलप्रेमीलाई आकर्षित गर्नका लागि राष्ट्रिय कुस्ती प्रतियोगिता, महिला र पुरुष भलिबल प्रतियोगितासमेत आयोजना गरिएको छ ।

कोशी गाउँपालिका क्षेत्रमा दैनिक २ सय पर्यटकलाई सुविधा दिनसक्ने होटल तथा होमस्टे सञ्चालनमा रहेका छन् । निजी लगानीमा १३ करोडको लागतमा सुविधा सम्पन्न रिसोर्ट निर्माणको कामसमेत धमाधम भईरहेको छ ।

प्रकाशित समय १६:०९ बजे