लाइफ इन्स्योरेन्स कर्पोरेसन नेपाल (एलआईसी नेपाल) ले गत आवको चौथो त्रैमासिकसम्मा १४ अर्ब ८३ करोड ८५ लाख २५ हजार २९१ रुपैयाँ खुद बिमा शुल्क संकलन गरेको छ । अघिल्लो वर्ष १३ अर्ब ३४ करोड ७१ लाख १७ हजार ३७६ रुपैयाँ संकलन गरेको कम्पनीले प्रतिकूल अवस्थामा पनि बिमा शुल्क संकलन करिब डेढ अर्ब बढाएको हो ।

एलआईसी नेपालको शुक्रबार प्रकाशित अपरिष्कृत वित्तीय विवरणअनुसार कम्पनीको कुल बिमा शुल्क आर्जन १४ अर्ब ९२ करोड ३८ लाख ५९ हजार छ । अघिल्लो वर्ष कम्पनीले १३ अर्ब ४१ करोड १७ लाख ९८ हजार रुपैयाँ आर्जन गरेको थियो ।

असार मसान्तसम्ममा एलआईसीले तीन अर्ब ७४ करोड पाँच लाख ७१ हजार ९५६ रुपैयाँ दाबी भुक्तानी गरेको छ । मृत्यु दाबी भुक्तानी तथा परिपक्वपश्चात गरिएको दाबी भुक्तानी अघिल्लो वर्ष तीन अर्ब ३४ करोड ९४ लाख १५ हजार ३३८ रुपैयाँ थियो । त्यस्तै कम्पनीको भुक्तानी हुन बाँकी रकम २० करोड २८ लाख १८ हजार ४० रुपैयाँ छ । अघिल्लो वर्ष दाबी भुक्तानी हुन बाँकी रकम १४ करोड ३३ लाख ८४ हजार १३० रुपैयाँ थियो ।

कम्पनीले सञ्चालन अवधीमा ११ करोड ९७ लाख ९१ हजार ९६४ रुपैयाँ नाफा गरेको छ । अघिल्लो वर्ष कम्पनीको नाफा १६ करोड हाराहारी थियो । गत आवसम्ममा कम्पनीले ७ लाख ६२ हजार १६३ वटा बिमालेख जारी गरेको छ ।

प्रकाशित समय १६:१७ बजे