नेपालको सबैभन्दा पुरानो बिमा कम्पनी नेपाल इन्स्योरेन्सले कोरोना महामारीका बीच पनि गत आर्थिक वर्षमा बिमा व्यवसाय वृद्धि गरेको छ । कम्पनीले अघिल्लो वर्ष खुद बिमा शुल्क संकलन ५४ करोड १२ लाख ८० हजार रुपैयाँ गरेकोमा गतवर्ष १२ करोडले बढाएर ६५ करोड ३७ लाख पुर्‍याएको छ ।

कम्पनीको कुल बिमा शुल्क संकलन भने केही घटेको छ । अघिल्लो वर्ष एक अर्ब १७ करोड ८९ लाख ९२ हजार रुपैयाँ कुल बिमा शुल्क आम्दानी गरेको कम्पनीले गत आवमा एक अर्ब १७ करोड ७४ लाख दुई हजार रुपैयाँ आम्दानी गरेको छ ।

नेपाल इन्स्योरेन्सले गत वर्ष १७ करोड ८५ लाख २१ हजार रुपैयाँ दाबी भुक्तानी गरेको छ । अघिल्लो वर्ष कम्पनीले २२ करोड ८८ लाख ७० हजार रुपैयाँ दाबी भुक्तानी गरेको थियो ।

कम्पनीले नाफा भने बढेको छ । अघिल्लो वर्ष २१ करोड चार लाख नाफा गरेको कम्पनीले गत वर्ष २३ करोड ६५ लाख रुपैयाँ नाफा गरेको हो ।  वित्तीय विवरणअनुसार गत वर्ष कम्पनीले १० करोड ५० हजार रुपैयाँ सरकारलाई आयकर बुझाएको छ । अघिल्लो वर्ष कम्पनीले आठ करोड १९ लाख ९७ हजार रुपैयाँ कर बुझाएको थियो ।

कम्पनीको बिमा कोष र जगेडा कोषमा जम्मा ८१ करोड २९ लाख रुपैयाँ जम्मा छ । अघिल्लो वर्ष ६५ करोड २९ लाख थियो । कम्पनीको प्रतिसेयर आम्दानी २१.५९ रुपैयाँ छ ।

प्रकाशित समय १५:३१ बजे