मोरङको पुरानो सदरमुकाम रंगेली नगरपालिकाका प्रमुख दिलिप बगडियाले पाँच वर्षे कार्यकालमा आफूलाई प्राप्त हुने तलब, भत्ता र अन्य कुनै पनि सेवा सुविधा नलिने घोषणा गरेका छन् ।

गत वर्ष असार २८ गते प्रमुख पद सम्हालेका बगडियाको एक वर्ष पुग्दै छ । प्रमुखले प्राप्त गर्ने मासिक ३० हजार तलब, बोर्ड बैठक भत्ता र विभिन्न गोष्ठी, सेमिनारमा प्राप्त हुने करिब ४५ हजार रुपैयाँ नलिने बगडियाले बताए । बगडियाले आफूलाई प्राप्त हुने सेवा सुविधा असाहाय, गरिब र विपत्तिमा परेका जनतामा खर्च गर्ने बताए ।

पारिवारिक जीवनका लागि नगरपालिकाबाट प्राप्त कुनै पनि रकम नलिने बगडियाको भनाइ छ । बगडियाले नगरपालिकाको गाडी सुविधासमेत आफूले प्रयोग नगर्ने घोषणा गरेका छन् । बगडियाले नगरपालिकाले प्रमुखका लागि खरिद गरेको गाडी आफूले नचढेर प्रमुख प्रशासकीय अधिकृतलाई प्रयोग गर्न दिएका छन् । उनी बगडिया प्रदेश १ कै ठूला उद्योगपतिमध्येमा पर्छन् । उनका विभिन्न स्थानमा इँटा उद्योग सञ्चालनमा छन्, जहाँ हजारौं स्वदेशी तथा भारतीय कामदार कार्यरत छन् ।

प्रकाशित समय १३:१९ बजे