सिद्धार्थ गुप्रअन्तर्गत तेल उत्पादन गर्ने कम्पनीले पटक–पटक गुणस्तरहीन खाद्यान्न उत्पादन गरी बिक्री गर्ने गरेको पाइएको छ । रुपन्देहीको गोनाहस्थित सिद्धार्थ आयल इण्डष्ट्रिज र सिद्धार्थ रिफाईनरी एण्ड सोलाभेन्ट इण्डष्ट्रिजले क्षेत्रीय खाद्य प्रविधि तथा गुण नियन्त्रण कार्यालयलाई पटक–पटक जरिवाना बुझाएको पाइएको हो ।

क्षेत्रीय खाद्य प्रविधि तथा गुण नियन्त्रण कार्यालय भैरहवा अनुसार १६ फागुन २०७३ मा तोरीको तेलमा पेरोक्सायर्डको मात्र बढी भएको भन्दै कार्यालयले मुद्दा चलाएको थियो । २ कातिक २०७४ मा पनि जिल्ला प्रशासनमा मुद्दा दायर गरिएको थियो । उक्त मुद्दामा कम्पनीले ८ मंसिर २०७४ मा २ हजार रुपैयाँ जरिवाना तिरेको थियो । पुनः सोही कम्पनीको नमुना जाँच गर्दा मात्र नपुगेको भन्दै जिल्ला प्रशासन कार्यालयले २ हजार थप जरिवाना तिराएको छ ।

सोही ग्रुपअन्तर्गतको सद्धार्थ रिफाईनरी एण्ड सोलाभेन्ट इण्डष्ट्रिजले तीन पटकसम्म जिल्ला प्रशासन कार्यालयमा जरिवाना बुझाएको छ । जिल्ला प्रशासन कार्यालय रुपन्देहीका नायव सुब्बा माधव घिमिरेका अनुसार उक्त कम्पनीले २५ मंसिर ०७४ मा एसिड भ्यालु र पेरोक्साईडको मात्रा बढी भएका कारण २ हजार रुपैयाँ जरिवाना तिरेको थियो । कम्पनीका सञ्चालक अपितकुमार अग्रवाल र राजेन्द्रप्रसाद अग्रवालले दोस्रो पटक १० हजार र पुनः ५ हजार जरिवाना जिल्ला प्रशासन कार्याललाई तिरेका छन् । पटक–पटक नमुना परीक्षण गर्दा नमुना फेल भएपछि जरिवाना तिराइएको जनाइएको छ ।

गत आर्थिक बर्षमा जिल्ला प्रशासन कार्यालयमा कुल ४ सय ३ मुद्दा दायर भएका छन् । आर्थिक बर्ष ०७३/७४ मा सरेर आएका कुल ११६ वटा र ०७४/७५ मा दर्ता भएका ३८७ गरी कुल ५ सय ३ वटा मुद्दा दर्ता भएको जनाइएको छ । जसमा कुल ४ सय २१ वटा मुद्दा फस्र्यौट भएका छन् । गत आर्थिक बर्षबाट चालु आर्थिक बर्षमा कुल ८२ वटा मुद्दा सरेर आएका छन् ।

यस्तै खाद्य प्रविधि तथा गुण नियन्त्रण कार्यालयले तेलमा दुर्गा मोडल आयल मिल पडसरी कटैयालाई पनि मुद्दा चलाएको छ । तेलमा नै रौनक तेल कम्पनीले पनि २ हजार जरिवाना तिरेको छ । गत आर्थिक बर्ष २०७४/०७५ मा क्षेत्रीय खाद्य प्रविधि तथा गुण नियन्त्रण कार्यालय भैरहवाले कुल ४ सय ५० वटा नमुना संकलन गरेको थियो । जसमा जम्मा १ सय ७१ वटा मात्रै नमुना परीक्षण गरियो । अन्य नमुना परीक्षणकै क्रममा रहेका छन् । १ सय ७१ मध्ये १३ वटाबारे जिल्ला प्रशासनमा मुद्दासमेत दायर गरिएको छ । जसमा कतिपयले मुद्दाबापतको रकम बुझाइ सकेका छन् भने कतिपय प्रक्रियामा रहेका छन् ।

प्रकाशित समय १७:४७ बजे