‘बैंक पनि साथी पनि, राम्रो पनि हाम्रो पनि’ भन्ने मूल नाराका साथ उत्तरदायी बैंकिङ अभ्यास गर्दै आएको एनआईसी एशिया बैंकले सुपर चामत्कारिक घर कर्जा, सुपर चामत्कारिक सवारी कर्जा र सुपर चामत्कारिक व्यवसाय कर्जा योजना सार्वजनिक गरेको छ । बैंकले नेपालको बैंकिङ क्षेत्रकै सर्वाधिक न्यून ब्याजदर तथा प्रशासनिक शुल्क रहेको तीन सुपर चामत्कारिक कर्जा योजना ल्याएको हो ।

योजनाअनुसार बैंकले ८.२५ प्रतिशत ब्याजदर तथा ०.२५ प्रतिशत प्रशासनिक शुल्कमा तीनै कर्जाहरु उपलब्ध गराउने र उक्त ब्याजदर एक वर्षसम्मका लागि परिवर्तन नहुने व्यवस्था गरेको जनाएको छ ।

सुपर चामत्कारिक घर कर्जाअन्तर्गत घर तथा अपार्टमेन्ट खरिद, घर निर्माण, घर निर्माण गर्नका लागि जग्गा खरिद आदि वित्तीय सेवा सुविधा लिन सकिनेछ । न्यूनतम पाँच वर्षदेखि अधिकतम ३० वर्ष कर्जाको समयावधि कायम गरिएको छ भने अधिकतम १ करोड ५० लाखसम्म कर्जा सीमा कायम गरिएको छ । जसअन्तर्गत अधिकतम ५० लाख रुपैयाँसम्मको ओभरड्राफ्ट सुविधासमेत लिन सकिनेछ ।

घर निर्माण गर्दाको हकमा बैंकले निर्माण लागतको शतप्रतिशतसम्म कर्जा प्रवाह गर्ने, घर निर्माणका लागि अधिकतम पाँच वर्षसम्मको मोराटोरियम अवधि लिन सकिने र उक्त अवधिमा ऋणीले कर्जाको ब्याजमात्र भुक्तानी गर्न सक्नेसमेत सुविधा छ । यसबाहेक फ्लेक्जिबल इएमईमार्फत ग्र्राहकले आर्थिक क्षमताअनुसारको इएमआई वार्षिक रुपमा आफैंले निधारण गरेर भुक्तानी गर्न सक्नेछन् । यो योजनाअन्तर्गत घर कर्जा उपभोग गरिरहेका ग्राहकले बन्डल अफरअन्तर्गत सवारी कर्जा उपभोग गर्न सक्ने व्यवस्थासमेत छ । अन्य बैंक तथा वित्तीय संस्थामार्फत घर कर्जा उपभोग गरिरहेका ऋणीले कर्जा स्थानान्तरण गरी आर्थिक भारलाई न्यून गर्न सक्ने बैंकले जनाएको छ ।

यस्तै सुपर चामत्कारिक सवारी कर्जाअन्तर्गत रातो प्लेटका निजी तथा व्यवसायका लागि सवारी र विद्युतीय सवारीका लागि कर्जा प्राप्त गर्न सकिनेछ । अन्य बैंकमार्फत सवारी कर्जा उपभोग गरिरहेकाहरुले पनि सुपर चामत्कारिक सवारी कर्जाअन्तर्गत कर्जा स्थानान्तरण गर्न सक्नेछन् । यो योजनाअन्तर्गत अधिकतम २ करोड कर्जा सीमा कायम गरिएको छ । सवारी धितो राखेको हकमा कर्जा अवधि अधिकतम १० वर्षसम्म र सवारी तथा रियल इस्टेट दुबै धितो राखेको खण्डमा अधिकतम १५ वर्षसम्म कर्जा अवधि हुने व्यवस्था गरिएको छ ।

बैंकले साना तथा मझौला उद्योग व्यवसायलाई प्रोत्साहन गर्न सुपर चामत्कारिक व्यवसाय कर्जा योजना ल्याएको हो । जसअन्तर्गत उद्योगी तथा व्यवसायीले आफ्नो व्यवसायको आवश्यकताअनुसार आवधिक कर्जा तथा ओभरड्राफ्ट मिश्रित रुपमा उपभोग गर्न सक्नेछन् । यस्तो कर्जा सीमा अधिकतम १ करोड रुपैयाँसम्म निर्धारण गरिएको छ ।

सुपर चामत्कारिक कर्जामार्फत ग्राहकलाई सहज रुपमा कर्जा प्रदान गर्ने रणनीतिअनुरुप आवश्यक कागजात प्राप्त भएको ४८ घण्टाभित्र निर्णय दिइने नायब प्रमुख कार्यकारी अधिकृत सुधिरनाथ पाण्डेले जानकारी दिए ।

प्रकाशित समय १३:२१ बजे