सनराइज बैंक लिमिटेडले बैंकिङ सेवा नपुगेका विभिन्न स्थानहरुमा बैंकिङ सेवा पुर्‍याउँदै जाने उद्देश्यका साथ गुल्मीको मालिका गाउँपालिका- ६, फुलबारीमा सेवा विस्तार गरेको छ । बैंकको यो ४९औं शाखारहित बैंकिङ सेवा हो ।

मालिका गाउँपालिका अध्यक्ष रितबहादुर थापा र सोही गाउँपालिका वडा नं ६ का वडाध्यक्ष शोभाखर गिरिको उपस्थितिमा शुक्रबार सेवा उद्घाटन गरिएको सनराइज बैंकले जनाएको छ । सो अवसरमा बैंकका प्रदेश नं ५ का प्रमुख सुनिल मण्डलको उपस्थितिमा बैंकको शाखारहित बैंकिङ सेवा प्रतिनिधि रीमा गिरीलाई पोइन्ट अफ सेल मेसिन हस्तान्तरण गरिएको थियो ।

उक्त मेसिनको माध्यमबाट बचत तथा भुक्तानीका लागि शाखा कार्यालय नभएको ठाँउबाट समेत शाखारहित बैंकिङ सेवाअन्तर्गत एटीएम कार्डमार्फत कारोबार गर्न सकिनेछ । बैंकका अनुसार यस सेवाबाट ग्राहकहरुले निक्षेप संकलन, रकम भुक्तानी, रकम स्थानान्तरण, बिल भुक्तानीजस्ता सेवाहरु लिन सक्नेछन् ।

हालसम्म सनराइज बैंकले १३४ वटा शाखा, ४९ वटा शाखारहित बैंकिङ सेवा, १० वटा एक्सटेन्सन काउण्टर र १६० वटा एटीएममार्फत आफ्ना ६ लाख ग्राहकलाई सेवा प्रदान गर्दै आइरहेको छ । यसका सेवा विस्तार गर्ने क्रममा नेपालका अन्य स्थानहरुमा पनि बैकिङ सेवा सञ्चालन गर्दै लैजाने योजना रहेको बैंकले जनाएको छ ।

प्रकाशित समय १७:५५ बजे