नेपालका हरेक क्षेत्रमा भारतीय गुप्तचर संस्था ‘रअ’का एजेन्टहरू सक्रिय छन् भन्ने सुनिँदै आइएको हो, अब भारतले औपचारिक रूपमा नै नेपालमा राजस्व गुप्तचर (कस्टम इन्टेलिजेन्स अफिसर) थपेको खुलासा भएको छ । नेपाल-भारतबीच हुँदै सम्पत्ति शुद्धीकरणका लागि धन लेनदेन बढेको भन्दै भारतले नेपाललमा राजस्व गुप्तचर थपेको हो ।

ती राजस्व गुप्तचरहरू वीरगन्जस्थित भारतीय महावाणिज्य दूतावास र काठमाडाैंस्थित भारतीय राजदूतावास मातहतमा परिचालित गरिएका भारतीय समाचार संस्थाहरूले जनाएका छन् ।  

भारतीय राजस्व अनुसन्धान विभाग (डीआरआइ)ले २ वर्षअघिबाट नेपालमा परिचालित गरेका ती राजस्व गुप्तचरहरूमध्ये कतिपयका म्याद पूरा भएर नेपालबाट बदलिइ सकेका जनाइएको छ ।

नेपाल र सिंगापुरसहितका देशमा राजस्व गुप्तचर परिचालनका अभ्यास सफल भएपछि भारतीय राजस्व अनुसन्धान विभागले लन्डन, दुबइ र हङकङमा यस्तै कर्मचारी परिचालनका लागि प्रक्रिया अघि बढाएको छ । ती स्थानमा परिचालन हुने राजस्व गुप्तचरका लागि आवेदन लिन थालिएको भारतीय समाचार संस्था पीटीआइले जनाएको छ ।

यसैबीच,नेपाल-भारतबीचका सम्पत्ति शुद्धीकरण नियन्त्रणका लागि हाल भारतले नेपालका सरकारी अधिकारीहरूलाई भारतमा तालिम दिइरहेको छ । कुल ६० जना नेपाली अधिकारीहरूलाई यस्तो तालिम दिइने नेपालस्थित भारतीय राजदूतावासले जनाएको छ । 

अहिले भारतमा तेस्रो समूहबाट २१ जना सरकारी अधिकारीहरूले सम्पत्ति शुद्धीकरणविरुद्धको अभियानसम्बन्धि तालिम लिइरहेका छन् भने यसअघि दुई ब्याचमा प्रशिक्षण दिइसकिएको जनाइएको छ ।

प्रशिक्षणपछि सम्पत्ति शुद्धीकरण र आतंकवादमा लगानीविरुद्धका मुद्दाहरुमा प्रभाकारी ढंगले लड्न उनीहरूका क्षमता बढ्ने भारतीय दूतावासले जनाएको छ ।

प्रकाशित समय १७:१८ बजे