सिटिजन लाइफ इन्स्योरेन्स कम्पनीले ७५ करोड रुपैयाँबराबरको साधारण सेयर निष्कासन गर्ने भएको छ । कम्पनीले प्रतिकित्ता १०० रुपैयाँ दरका ७५ लाख कित्ता सेयर निष्कासन गर्न लागेको हो ।

सार्वजनिक निष्कासनका लागि कम्पनीले एनआईबिएल एस क्यापिटललाई निष्कासन तथा बिक्री प्रबन्धकको जिम्मेवारी दिएको छ । यससम्बन्धी सम्झौतापत्रमा सिटिजन लाइफका प्रमुख कार्यकारी अधिकृत पोषकराज पौडेल र एनआईबिएल एस क्यापिटलका नायब प्रमुख कार्यकारी अधिकृत मेखबहादुर थापाले हस्ताक्षर गरेका छन् ।

अधिकृत पुँजी ३ अर्ब रुपैयाँ रहेको कम्पनीमा संस्थापक सेयरधनीबाट १ अर्ब ७५ करोड रुपैयाँ चुक्ता भइसकेको छ । सर्वसाधारणका लागि छुट्टयाइएको रकम ७५ करोडको सेयर जारी गरेसँगै कम्पनीको चुक्ता पुँजी २ अर्ब ५० करोड रुपैयाँ पुग्नेछ ।

सिटिजन लाइफले गत आवमा व्यवसाय वृद्धिसँगै जीवन बिमा कोष १६४ प्रतिशतले र कुल बिमा शुल्क आर्जन ६९ प्रतिशतले बढाएको छ । कम्पनीको जगेडा कोषको आकार पनि २२ करोड ८६ लाखबाट ११७ प्रतिशतले बढेर ४९ करोड ६१ लाख पुगेको छ । त्यस्तै लगानी र बिमालेखको धितो तथा अन्य कर्जाबाट प्राप्त हुने आयमा ३१ प्रतिशत वृद्धि भई ३३ करोड ८३ लाख रुपैयाँ पुगेको छ ।

प्रकाशित समय ११:१९ बजे