नेपालको पुँजीबजारमा बैँक तथा वित्तीय संस्थाको हिस्सा ६८ प्रतिशत छ । मंसिर मसान्तसम्मको तथ्यांकअनुसार नेपाल स्टक एक्सचेन्जमा सूचीकृत २१२ संस्थामध्ये बैँक तथा वित्तीय संस्था (बिमा कम्पनीसहित) १४४ वटा रहेको राष्ट्र बैँकले जनाएको छ ।

कुल बजार पुँजीकरणमा भने यी समूहको हिस्सा ७१ प्रतिशत छ । त्यस्तै, नेप्सेमा ३५ जलविद्युत कम्पनी सूचीकृत छन् भने उत्पादन तथा प्रशोधन उद्योग १९ वटा छन् । नेप्सेमा व्यापारिक संस्था र होटल संख्या ४/४ छन् । त्यस्तै अन्य समूहका संस्था ६ वटा छन् ।

पुँजीकरणका हिसाबले जलविद्युत कम्पनीको हिस्सा ६ प्रतिशतमात्र छ । त्यस्तै उत्पादन तथा प्रशोधन उद्योगको हिस्सा ४, होटलको १, व्यापारिक संस्थाको ०.४ र अन्य समूहको १६.७ प्रतिशत छ ।

मंसिर मसान्तसम्ममा नेप्सेमा सूचीकृत ५ अर्ब ६१ लाख कित्ता सेयरको चुक्ता मुल्य भने ४ खर्ब ९१ अर्ब २४ करोडबराबर छ । चालू आवको पाँच महिनामा नेप्सेमा १ खर्ब ५० अर्बबराबरको विकास ऋणपत्र, ११ अर्ब ४१ करोडबराबरको साधारण सेयर ५ अर्ब ८० करोडबराबरको बोनस सेयर, ७ अर्बबराबरको डिबेन्चर, २ अर्ब ५० करोडबराबरको हकप्रद सेयर र ६५ करोडबराबरको म्युचुलअ फन्ड गरी १ खर्ब ७७ अर्बको थप धितोपत्र सूचीकृत भएका छन् ।

यो अवधिमा नेपाल धितोपत्र बोर्डबाट ५ अर्ब ४ करोडबराबरको डिबेन्चर, २ अर्ब २ करोडबराबरको साधारण सेयर ५३ करोड ३७ लाखबराबरको हकप्रद सेयर र ५० करोडबराबरको म्युचुअल फन्ड गरी ८ अर्ब १० करोडबराबरको धितोपत्र निष्कासन गर्न अनुमति दिएको छ ।

प्रकाशित समय ०९:१६ बजे