रुपन्देही व्यापार संघको आयोजानमा ‘स्वरोजगार आत्मनिर्भरता हाम्रो आधार, सहरदेखि गाउँसम्म व्यापार विस्तार’ भन्ने मूल नाराका साथ यही पौष ५ देखि १८ गतेसम्म लुम्बिनी एक्स्पो–२०७५, अन्तर्राष्ट्रिय व्यापार मेलाको आयोजना हुने भएको छ ।

मेला परिषरमा बुधबार पत्रकार सम्मेलन गरी आयोजक संस्थाले यसको तयारी सुरु गरिएको जनाकारी दिएको हो । रुपन्देही व्यापार संघका अध्यक्ष पदम प्रसाद श्रेष्ठका अनुसार मेलामा करिब ६०० स्टलको सहभागिता रहनेछ । ८ लाख बढी दर्शकको सहभागिता तथा करिब ५० करोड बराबरको कारोबार हुने अपेक्षा गरिएको उनले बताए ।

मंसिरको दोस्रो हप्तादेखि संघको सचिवालय मेला स्थल बुटवल मण्डपमा स्थानान्तरण भई मेलाका आवश्यकीय कार्यहरु जस्तैः निर्माण कार्य, स्टल दर्ता, प्रचारप्रसार लगायतका तयारीका कामहरु आरम्भ गरिएको उनले जानकारी दिए ।

व्यावसायिक विविधताको समागम केन्द्र प्रदेश नं. ५ को राजधानी बुटवलमा पुनः आयोजना गर्न लागिएको लुम्बिनी एक्स्पो–२०१८, अन्तर्राष्ट्रिय व्यापार मेला यस क्षेत्रको पर्यटन व्यवसाय विस्तारमा समेत महत्वपूर्ण सावित हुने विश्वास लिएको उनले बताए ।

मेलामा गौतमबुद्धको जन्मस्थल लुम्बिनीसहित प्रदेश भित्रका सम्पूर्ण धार्मिक, सांस्कृतिक, पर्यटकीय तथा ऐतिहासिक महत्व बोकेका सम्पदाहरु एवं पावन स्थलहरुको प्रवद्र्धनात्मक प्रचारप्रसारसमेत गर्ने अध्यक्ष श्रेष्ठको भनाई छ ।

तरकारी तथा फलफूल एवं कृषि उत्पादनका हिसाबले भइरहेको उत्पादनलाई व्यवस्थित र प्रचुर सम्भावनालाई दृष्टिगत गरी मेलामा अलगअलग पेभेलियन बनाई कृषि तथा विभिन्न व्यवसायलाई प्रेरित गर्ने अभियान संचालन गर्ने उद्देश्यसमेत रहेको आयोजकले बताएको छ ।

औद्योगिक उत्पादन र त्यसको गुणस्तर एवं उपभोक्ता बीचको सम्बन्धमा सामिप्यता ल्याउन र लगानीकर्तालाई नयाँ व्यावसाय स्थापना गर्न प्रोत्साहन गर्ने गरी यस अन्तर्राष्ट्रिय स्तरको एक्स्पोको आयोजनाले बुटवल तथा समग्र राष्ट्रकै गरिमा र गौरबलाई अभिवृद्धि गर्न अमूल्य योगदान पुर्याउनेछ भन्ने अपेक्षा गरिएको उनले बताए ।

प्रकाशित समय १७:४६ बजे